Awan ti madlaw a sintoma ti sobra a danum bayat ti panagdakkel ti pagay, kas iti nakapuy a panaggipi ken babassit a bulbulong. Sobra ti danum no ad-adalem ngem 5sm, ken agpaut iti 7 nga aldaw wenno nabaybayag pay. Awan met madlaw a sintoma ti tikag bayat ti panagdakkel ti pagay, kas iti aglukot a bulong, magango a murdong ti bulong, ababa a bulbulong, pandek ti pagay, ken bassit ti gipi. Awan latta ti sintoma ti tikag manipud panaginaw agingga iti panagbagas, kas iti aglukot a bulong, magango a murdong ti bulong, saan a makaruar a dawa, ken adu unay nga eppes a binukel.

No 120 nga aldaw ti kabayag ti pagay, gagangay nga agdawa iti 40-45 AKR wenno 61-65 AKS. Agluom met iti 70-100 AKR wenno 91-120 AKS (kitaen ti Kahon 6).

• Agpadanum iti 3-5 sm laeng manipud panaggipi agingga iti 1-2 a lawas sakbay ti panaggapas.

  Ti 3-5sm laeng a padanum manipud 10 AKR wenno 10-15 AKS agingga nga agtangken ti pagay ti kasayaatan para iti panagdakkel ken panagapitna iti adu. Ngem iti mismo a talon, mabalin a nakiddit no dadduma ti padanum. Nupay matengngel ti ruot no sidadanum ti talon, makontrol met ti panagdakiwas ken panagdangran ti golden kuhol no apagsalapasap laeng ti danum bayat ti panagungar ti raep, wenno sabog.

  Mabalin nga usaren ti kontrolado a panagpadanum. Iti kontrolado a panagpadanum, saan a matikag wenno mataktak ti panagdakkel ti pagay, main-inut pay ti danum. Iti daytoy a wagas, mabalin uray mapaatianan ti talon, agingga iti 15 sm a kauneg ti agneb (perched watertable) iti kalgaw ken 20 sm iti panagtutudo, sa manen padanuman. Maaramid daytoy manipud panagraep agingga iti kapigsa ti panaggipi. Iti panawen nga agsabong ti pagay, mapagtalinaed ti 3-5 sm a danum iti talon.

  Tapno mamunitor ti karabaw ti danum iti uneg ti daga, mangipasok iti talon iti 30sm ken naabutan a tubong (kawa-yan wenno lata), iti kauneg a 20sm (sangadangan) manipud rabaw ti daga.

• Paatianan ti talon wenno isardeng ti agpadanum 1-2 a lawas sakbay ti gapas. Para iti naruka a daga, paatianan ti talon makalawas sakbay ti gapas. Paatianan ti medio napigket a daga 2 a lawas sakbay ti gapas.

  Itoy a wagas, adda umdas a danum tapno agbagas amin a dawa ken nalakanto ti aggapas. Napintasto pay ti langa ti irik, awan pitakna ken namaga pay.