• Binalhin o transplanted nga humay. Gikinahanglan ang 20 hangtod 40 kilos nga binhi sa matag ektarya kung inbred nga klase ug 15 hangtod sa 20 kilos nga binhi sa matag ektarya kung hybrid nga binhi. Puli-an ang mga bakanting punoan diha sa tudling sulod sa 7 ka adlaw gikan sa pagtanum, susihon ang barog sa mga tanum pag-abot sa 10 ka adlaw gikan pagtanum. Kinahanglang nga adunay 25 ka punuan sa humay nga himsog sa matag metro kwadrado.
  
  Magpili og tulo ( 3 ) ka luna nga may gidak-on nga usa ka metro kwadrado ang matag luna subay sa linyang “diagonal” tabok sa pilapil o luwang. Kinahanghan nga kini nga mga luna may distansya nga usa ( 1 )ka metro gikan sa daplin sa luwang o pilapil.
  
  Ihapon ang tanan nga punuan sa humay sulod sa usa ( 1 ) ka metro por usa ( 1 ) ka metro nga kwadrat. Isumada ang tanan ug bahinon sa makatulo aron makuha ang katamtamang gidaghanon sa punuan sa humay sa matag metro kwadrado (average number of hill/m2).
  
  
• Direktang sinabod nga humay sa basakan (DWSR). Mga kinse ( 15 ) ka adlaw gikan sa pagsabod sa pinaturok na daan nga binhi sa humay, kinahanglan nga susihon kon adunay sinto singkwenta (150) ka punuan sa humay ang matag metro kwadrado sa basakan kon cuarenta (40) ka kilos sa binhi ang gigamit matag ektarya. Sa laing bahin, kinahanglan nga adunay tresintos (300) ka punuan matag metro kwadrado kon otsinta (80) ka kilos sa binhi ang gisabwag sa matag ektarya.
  
  Aron masusi ang gidaghanon/kabag-on sa tanum, paggamit sa 1 m x 1 m kwadrat (1 m2). Magpili ug tulo (3) ka luna nga maoy kuhaan og sample subay sa “diagonal” nga linya tabok sa pilapil o luwang. Ang matag luna kinahanglan modistansya og dili momenus sa usa (1) ka metro gikan sa daplin pilapil matag luna o 1 m x 1 m kwadrado.
  
  Ihapon ang tanan nga mga punuan sa humay sulod sa usa (1)ka metro o 1 kwadrado sa matag luna. Isumada ang tanan ug bahinon sa makatulo aron makuha ang kasagaran nga kadaghanon sa humay (plant density).
  
  Sa matag luwang sa transplanted ug sa direktang sinabod, magpili og napulo (10) ka punuan. Kinahanglan nga adunay bisan usa ka himsog nga tanum ang mo barog, berde ang kolor sa dahon, maayo ang tubo ug luwas sa peste ug sakit.
  
  

Magsabwag sa insaktong gidaghanon sa binhi aron adunay lig-on ug himsog nga semilya. Kini moresulta og daghang buhi nga semilya nga dali mkabawi gikan sa pagkabun-og diha sa pag-ganit ug pagbalhin tanum.

Ang paggamit og daghang binhi moresulta og niwang og luya nga semilya. Ang insaktong gilay-on sa pagtanum sa humay makapadali pagpatubo ug igo-igo ang pagpanaha aron usab mapugngan ang pagdaghan sa mga sagbot.

• Alang sa binalhin nga humay (transplanted), himoon ang semilyahan duol sa tuburan sa tubig ug sa lugar nga dili sayon atakehon sa mga dangan sama sa langgam ug ilaga. Kinahanglan adunay sakto nga gawasanan sa tubig o drainage.
  
  Importante kaayo ang insaktong pagmaneho sa tubig ug dangan sa panahon sa pagtagud. Kon sobra sa tubig ang semilyahan moresulta kini sa huyang nga gamut ug luyahon nga mga semilya tungod sa kakulang sa hangin nga mosulod sa ilawom sa yuta. Ibton sa mga langgam ug kaonon sa mga ilaga ang mga turok nga binhing gisabod sa semilyahan. Busa importante kaayo ang insaktong pag-atiman ug pagbantay sa semilyahan sa humay.
  
  Mag-labay og organiko nga materyales sa dili pa magsapil sa semilyahan. Alang sa pino ug grano nga yuta, isagol ang 10-15 ka sako nga organiko nga materyal o 3-4 ka sako nga komersyal nga abono sa 400 metro kwadrado nga semilyahan sa dili pa isabwag ang pinaturok nga binhi.
  
  Ang mga organikong abono makatabang sa pagpahumok sa yuta aron dali ra ibton ang semilya ug menus ang kadaut sa mga gamut. Paggamit sa compost ug bisan unsa nga mga organikong abono sama sa mga pinauga nga hugaw sa mga mananap, giuling nga pak-pak sa humay, ug mga dagami.
  
  Alang sa mga klase sa yuta nga kasagaran ang grano (medium textured), pwede na nga dili butangan sa mga organikong abono.
  
  
• Alang sa direktang sinabod nga humay, isabwag lang ang binhi sa semilyahan human mahimo ang gilagda sa Key Check 2 kabahin sa insaktong pagdaro ug pagsapil sa yuta. Ang pinaturok nga mga binhi o semilya kinahanglan nga protektahan gikan sa mga langgam, ilaga, kuhol, ug mga sagbot pinaagi sa pagsunod sa pagkontrolar sa mga dangan nga anaa sa pamaagi sa pagdumala sa peste. Kinahanglan angayon sa pagsabwag ang pinaturok nga binhi ngadto sa maayo nga pagkasapil nga semilyahan.
  
  Magsabod ug mga 1 ka kilo nga pinaturok nga binhi sa kilid sa basakan para pang-puli. Hulipan ang mga bakanteng lugar sulod sa 7-10 ka adlaw gikan sa pagsabwag.