Para sa Tanum

Maggamit sang 20-40 kilos nga kadamuon sang binhi kon inbred kag 15-20 kilos sa kada ektarya kon hybrid. Pagkatapos maghulip makalipas ang 7 ka adlaw pagkatapos tanum (APT), usisaon anay ang kahimtangan sang gintanum sa 10 ka adlaw pagkatapos tanum (APT). Kinahanglan nga may 25 ka tisok sa kada metro kwadrado. Magkuha sang 3 ka sampol pabalasbas sa kahon. Ang ginkuhaan sang sampol dapat indi magnubo 1 ka metro ang antad halin sa kilid sang kahon.

Isipon kon pila ka tisok ang ara sa kada metro kwadrado. Tingbon ang tanan nga naisip nga tisok kag pagkatapos bahinon sa 3 agod makuha ang average nga kadamuon sang tisok sa kada metro kwadrado.

Para sa Sab-og

15 ka adlaw pagkatapos magsab-og sang ginpapisik nga binhi, kinahanglan nga may ara indi magnubo sa 150 ka puno sa kada metro kwadrado kon maggamit sang 40 kilos nga binhi sa kada ektarya, kag indi magnubo sa 300 ka puno kada metro kwadrado kon maggamit sang 80 kilos nga binhi sa kada ektarya.

Para mahibal-an ang kadamuon sang tanom, maggamit sang 1 ka metro kwadrado. Magkuha sang 3 ka sampol pabalasbas sa mga kinahon. Ang ginkuhaan sang sampol dapat indi magnubo 1 ka metro ang antad halin sa kilid sang kahon.

Isipon kon pila ka tisok sa kada metro kwadrado. Tingbon ang tanan nga naisip nga tisok kag pagkatapos bahinon sa 3 agod makuha ang average nga kadamuon sang tisok sa kada metro kwadrado.

Sa kada kahon sang talamnan, gintanum ukon sab-og man magkuha sang 10 ka tisok. Kinahanglan nga ang kada tisok may isa ka malambo nga puno sang humay. Ang malambo nga puno berde, maayo ang tubo, wala sang peste kag balatian.

Pahanumdom: Ginapanugyan ang pagtanum sang isa tubtob duha ka puno kada tisok tungod sa kamahalon sang binhi.

Kadako sang kahigayonan nga madali maumpawan ang sabod pagkatapos tanum. Ang gasulolobra nga kadamu-on sang binhi nagaresulta sang maniwang kag maluya nga sabod. Ang nagakaigo nga distansya sang pagtanum kon magdabong mahimo makapalumos sang hilamon.

Para sa Tanum

Maghimo sang saboran lapit sa ginhalinan sang tubig kag protektado sa mga peste, ilabi na gid sa mga pispis kag ilaga. Kinahanglan nga mahapos pasudlan o pahubsan sang tubig.

Ang nagakaigo nga pagdumala sang tubig kag peste importante sa sini nga tinion. Kon ang ginsabod nga binhi napatubigan sang sobra nga kadalumon, magaresulta sang mahuyang nga sabod kag pigaw nga pagtubo sang gamot bangod sa kakulangan sang hangin sa duta. Ang mga pispis kag ilaga nagapangaon sang binhi kag ginagabot ini gani kinahanglan maprotektahan ang saboran sa sini nga mga peste.

Magsab-og sang organiko nga materyal antis tapanon ang saboran. Para sa pino nga klase sang duta, magsab-og sang 10-15 ka sako nga organiko nga materyales ukon 3-4 sako nga komersyal nga organiko nga abono sa kada 400 metro kwadrado nga saboran antis mag sab-og sang binhi.

Ang organiko nga materyales makabulig agod mangin mahumok ang duta. Sa sini, mahapos ang paggabot sang sabod kag mapahaganhagan ang pagkaperdi sang mga gamot. Maggamit sang kompos ukon iban pa nga dunot na nga organiko nga butang parehas sang ipot sang mga sapat, uling nga labhang, ukon uhot.

Pwede nga indi na maggamit sang organiko nga materyales kon lapnoy nga duta.

Para sa Sab-og

Sarang na nga sab-ugan ang talamnan pagkatapos nga mahabay suno sa rekomendasyon sang Key Check 2. Dapat maprotektahan ang ginsab-og nga binhi sa pispis, ilaga, kuhol kag hilamon ang pinatubo nga binhi suno sa pamaagi sang pagdumala sang peste. Talaid nga isab-og ang binhi sa talamnan.

Mag-sabod sang isa (1) pa gid ka kilo nga binhi sa kilid sang talamanan para ipang hulip. Magpang hulip sa sulod sang 7-10 ka adlaw.